In the Name of Allah the Most Gracious the Most Merciful

Home

Donate

Photo Gallery

Video Gallery

Somali

What's New

Contact us

     
 

H I M I L O

 
     
 

READ Webmaster: (Waa qayb yar oon ka soo dheehday gabay dheer oo la magac baxay “himilo” uu hal abuuray Abwaan Axmed warsame xasan ‘daweeye’ oo ka mid ah taageerayaasha daneeya waxqabadka Ururka READ/IQRA

 

Daweeye: “War nabada lagu sii (wnls) Gabaygani cidkastuu khuseeyaa laga bilaabo Qolo ilaa Qaran; Dawlad iyo shacab labadaba. (labada tuduc ee leh calamaddan (*) macnahoodu la xintama maaha waase la tartama. Tartanku waa sharaf xintankuna waa dulinimo Waxan idhi: (laynba laynkuu ka horeeyo ku qabo).”   29-06-05 London

 

Hirkaloo danteena ah

Hadaan idin haleelsiiyo

Idinkoon ukala hadhin midnimo 

Himiladheer qaata

Nin walboow waxaad heli kartiyo

Hura aqoontiina

Haweeniyo caruuriyo ninweyn

Hidiya maalkiina

Hadba heeribay taagantee 

Himila dheer qaata

Dekedda an haraadka u qabne`e 

Hadaftay doon-doona

*Hoosada Jabuutiyo Barbara*

*Hab uga kaaftooma*

Hartan Saylac noo qoda

Shacbigu wuu hadhgelayaaye

 

 

Hirkaloo danteena ah hadaan

Idin haleelsiiyo

Baddan soo haraaciday kaluun 

Shabag ku soo hoysta

Doonyaha itood halabsataan

Soo hirqada khayrka

Markaad gaajo kala haajirtaan 

Hadhayna sii dhoofsha

Hayaan baa adduunyada jire`e

Himilo dheer qaata

 

 

Afartaa hanaankii abwaan

Hadaladiisiidhe

Hindisaha sidaan doonayiyo 

Horumarkeenii dheh

Hada kalena waa maansadaan 

Soo haloosiyey-ye

Horusocodka iyo guurtidaan 

Soo hor dhogayaaye

An haaneedo waataan murtida 

Hoodo ku lahaaye

Hareeraha adduunyada

dab baa la`isku haystaaye

Naftu heegan bay aamintoo 

Haakah laga waaye

Waxba lama heshiiye`e

Sirbaa laysku hodayaaye

Habeen iyo dharaar

Shiishka waa lays hor dhigayaaye

Hootadu nin kay debecsantahay

Haadku ku casheeye

Kii an Hawsar sidan 

Xaajo way ka hanfariirtaaye

Hindisaha ku dara

Ina ragbaad la hirdamaysaane

 

 

 

 

Afartaa hanaankii abwaan

Hadaladiisiidheh

Hindisaha sidaan doonayiyo 

Horu markeenii dheh

Hada kalena waa maansadaan

Soo haloosiyey-ye

Horusocodka iyo guurtidaan

Soo hordhigayaaye

An haaneedo waataan murtida

Hoodo ku lahaaye

 

 

Kii horseeday kii soo halgamay 

Kii hurdada seexday

Iyo ka`an habeen qudha dan guud 

Faras u heensaynin

Ka hungurigu leexshee waxkale

U hanqal taagaaya

War taariikh hadhaysaa jirte`e 

Himilo dheer qaata.

Hirkaloo danteena ah haddaan 

Idin haleel siiyo

 

 

Ubadkeenu yey haydal noqon

Laga horeeyaaye

Higaaddii quraankiyo u dira 

Macalimiin haysa

Hagar li`i agoomaha wax-qabad

Hooda ugu deeqa

Hooygii tacliintaan nehee 

Huriya baaruudda

Iqrana way hubqaadaye kudara 

Hadaf kaloo muuqda

Kuwii soo haloosiyey abaal 

ula han waynaada

Hangool lagu cadaadshiyo 

Ma geyo inad hantaaqdaaye

Halbawlaha nin-doorka ah mar qudha 

Hibo ku taageera

Hambalyeeya kii hawl-gal-qaran

Soo holada xaajo

Mid hadduu hawaawiyo mar kale

Hoos wax ugu sheega

Hogaan wacan inaad yeelataan 

Geliya haab kina

Hilib qudha inaad wada tihiin

Geliya haabkiina

Hooyo mida inaad wada jaqdee 

Geliya haabkiina

Hadhuub culan inaad wada dhanteen 

Geliya haabkiina

Inad hurin walaala ah tihiin

Geliya haabkiina

 

 

Hada kalena waa duco Allaan 

Hiilka sugayaaye

ilaahaw shirkii lagu hodmee 

Noo hirgala kaadhig

Habaqlaan ku noolee Alloow 

Hilinka noo toosi

ILaahoow hanuun gaara sii 

Kaayaga habawsan

Hawo caafimaad guul Alloow

Hogol darrooraysa

Heshiis baan ka sugayaa

Fadhigan hadalna waa yeela.

 

 

Wixii Su`aalo ah waxad kala xidhiidhi kartaan:

Abwaan Daweeye tel:+447949132752 London uk E-mail: daweeye2000@yahoo.co.uk

 

Kor

 Copyright © 2000 - 2004 Rural Education And Development. All rights reserved.