BOGGA SUUGAANTA

(1 - 2 - 3 - 4 - 5):

Dhalintii Dalkaygaay

 

Xasuus: Kolba sadarka (labadiisa qaybood) isku akhri
Dhalintii dalkaygaay	Dhallintii dadkaygaay
Dharaarahan ma aan maqal	Dhawaq kaa baxaayoo
Dhex mushaaxa dunidiyo	Hadalladii dhawaanahan
I dhaqaajay ruuxdiyo	Halka aan u dhacayee
Dhimashada I gaysee	Dhulku iila ooyee…
Ma og tahay dharkaygoow	Marka aad dhahaysaan
Ee aad dhaqaaqiyo	Ku dartaan dhirayn iyo
Ka dhabayn halhaysiyo	Isu dhiibid taladiyo
Dhibta qaybsigeedaan	Aniguna dhagaystaa
Ereyada an dhuuxaa	U diraa dhulkaygiyo
Halka aan ku dhaartee	Dhibtu igaga taaloon
U rogaa dhalaaliyo	Dharab iyo tigaadoo
Sida dhuurtii xeebtoo	Intuu xayskii dhigay dhigay,
Dhigay dhigay, dhigay dhigay….	Cawsha orodka dheeriyo
Sagaaradu dhasheedii	Dhambaalka isu diray iyo
Kulankoo ku dhaar galay	Inu miraha dhiinka ah
Dhinacyada u ridiyoo	Marka aad dhex joogteed
Dhibic muudsanayseed	Hadba dhinac miliilica
Ishu ay ka dharagtoo	Dhugashada habeenkii
Dayaxoo dhar xiranoo	Dhakadaada joogoo
sidii ay dharaar tahay	dhulka wada iftiinshoo
dhallintuna ciyaaraha	gego loola dhacayoo
sacabkii dhacaayiyo	dhawaqii is xirayoo
dhagta aad la raacdaan	dhidib loogu taagaa
Waa su'aal dharaarahan	Dhinacayga taalloon
Ka dhigaayay ruux aan	Dhalan maalmahaanoo
Dhabta saaranaayiyo	Dhaankaa an rarayee
Ka dhursuga lahaa iyo	Dhays aan arkaayoon
Rabo inan ka dhiijiyo	Dambar aan dhaashado..
Dhawaqii halkuu maray	Ma la dhigay dareenkii
Dhiigii ma joogsaday	Dhulkii nabad ma lagu yahay
Ma dhamaatay hawshii	Ma hinqaday dhallaankii
Dhag-dhag maan ku sheegaa	Wixii aan ku dhaar galay
Kolka inuu dhamaad yahay?	Dhinacayga goortaan
Darintayda dhacadiid	Barkimada u dhigan laa
Dhimbiil maa la joogaa	Mise wali wax baa dhiman?
Caku yaan la dhaawicin	Dhimirkiyo dareenkoo
Dhudhunkiina kaalmada	Ku dhaqaaja waligiin
Kii dhinac u baydhana	Dhabarkiyo tagoogtiyo
Dhasha iyo caruurtaan	Ka dhursugi ayaamee
Iska dhaafa oo yaan	Raadraacna laga dhigan
Dhaqankiisa foorara!!!!!!
waxa tiriyey: Maxamed Maax Maxamuud

1 - 2 - 3 - 4 - 5